DI.ME.

DIVERSIDADE MENTAL

DI.ME. é unha entidade autoxestionada como camiño para reivindicar a nosa voz e os nosos dereitos como colectivo, formada por persoas con experiencia en trastornos mentais. Nace da necesidade de construír espazos integrados por persoas máis ou menos psiquiatrizadas, abríndonos á participación doutras que estean dispostas a asumir un diálogo horizontal, honesto e sincero.

O noso obxectivo global é sumar e colaborar na construción dunha sociedade na que a diversidade mental sexa concibida como un aspecto máis da nosa identidade, enriquecedora e non desdeñable. Por iso cremos que a expresión das nosas dificultades é unha ferramenta básica que non está sendo escoitada desde o sistema de saúde actual, para o que consideramos fundamental o apoio mutuo. Entendemos que somente o devandito cambio de mentalidade pode axudar a superar o medo e rexeitamento aínda presente na sociedade. Da mesma forma, entendemos que compartir as nosas experiencias ofrece esperanzas e axuda á recuperación das persoas que agora mesmo están atravesando un episodio complicado.

PARA QUÉ

• Colaborar na construción dunha sociedade na que a diversidade mental sexa concibida como un aspecto máis da nosa identidade para superar prexuízos que provoquen sufrimento e perda de dereitos fundamentais.
• Atopar outras solucións para apoiar ás persoas mergulladas en circunstancias de sufrimento pola perda dos dereitos ou a dignidade por mor das súas condicións de diagnóstico mental.
• Promover a realización de grupos de axuda mutua en saúde mental.
• Ofrecer respaldo mutuo.
• Chegar ás persoas que se atopen en situación de desamparo, maltrato ou marxinación por causa de dano e malestar na saúde mental.
• Promover e fortalecer o voluntariado entre as persoas con Diversidade Mental.
• Validar a axuda que fornecen as persoas con experiencia en episodios de dano na saúde mental como unha vía de comprensión cara outras que pasan por semellantes circunstancias.
• Realizar cursos de formación e empoderamento para as persoas con Diversidade Mental, familiares e calquera outro colectivo que estea interesado.
• Ofrecer esperanza e axuda na recuperación ás persoas que agora mesmo están a atravesar un período complicado.
• Acompañar e coidar das persoas que precisen axuda, por atoparse en risco de sufrir dano, en períodos de crise, internamento ou final de tempadas de internamento.
• Fornecer espazos para o encontro, intercambio e colaboración das persoas involucradas nos programas.
• Promover a realización de actividades culturais, artísticas e expresivas como canle de mellora e cohesión.
• Favorecer a elaboración de propostas multi e interdisciplinares que non desatendan a voz narrativa das persoas que viven situacións de sufrimento psíquico.

CÓMO

Formación

Cursos para ás persoas voluntarias comprometidas com o proxecto.

Creación de grupos de debate, autocoñecemento e axuda mutua

Organizaremos periodicamente grupos de debate e apoio mutuo para compartir as experiencias e acadar apoio doutras persoas con procesos similares. Reunións no local da Fundación Eomaia en Ponteareas.

Conferencias, mesas redondas, encontros e congresos

Asistencia a eventos que se realicen na comunidade autónoma de Galicia e fóra da comunidade que teñan como común denominador a atención  e mellora da situación das persoas que sofren por dano e perda temporal de saúde mental.

Puntos permanentes de información

 Punto de información para todas aquelas persoas que mostren interese no programa de voluntariado para o acompañamento na diversidade mental.

Servizo de atención ao público no local da fundación Eomaia situado na Praza Maior 45 de Ponteareas, no que se pode recibir a información da actividade que desenvolvemos e os servizos de voluntariado que prestamos.

A persoa interesada en recibir información ou asesoramento sobre calquera dos temas que trata a fundación neste programa, deberá solicitar cita previa para que poda ser atendida pola persoa máis indicada.

Edición de folletos informativos

Prestación de servizos asistenciais de acompañamento a persoas que sofren ou sufriron por perda de saúde mental

O acompañamento realizarase en:

Casas, hospitais e na realización de actividades  no marco dos espazos da fundación Eomaia.

De xeito presencial, no lugar onde se atope a persoa interesada, se se atopa coa imposibilidade de desprazarse.

En casos de internamento ou noutras circunstancias, podemos acordar unha cita para ter un encontro.

Poden darse casos nos que prime a urxencia, polo que, unha vez que a persoa ou representante ou algunha achegada daquela, se poña en contacto con nós, acudiremos ao lugar no prazo máis breve posible.

A través de atención telefónica. No teléfono 658799470

Atención por correo electrónico

No enderezo diversidademental@gmail.com , que será atendido por Galiza Quinteiro Rendo.