Información Programa Tribo Vedraña

DENOMINACIÓN DO PROXECTO

PROXECTO: “A TRIBO VEDRAÑA” do PROGRAMA “A BOA MORTE” de FUNDACIÓN EOMAIA. SUBVENCIONADO POLA DIPUTACIÓN DE PONTEVEDRA.

Proxecto de desenvolvemento comunitario co fin de afrontar a morte dignificando o final da vida e reflexionar, falar e planificar en vida decisións, desexos e vontades.

FUNDAMENTACIÓN OU XUSTIFICACIÓN

O proxecto “Tribo Vedraña” parte da comunidade para dar servizo á comunidade. Crecer na confianza de que somos persoas capaces de tomar as rendas, de dar atención en circunstancias de enfermidade avanzada e nas fases finais da vida ata a morte, mediante a prestación de coidados, o acompañamento e o uso da información en beneficio dunha morte
elixida, decidida e respectada.

O acompañamento á morte comeza cando a persoa necesita compañía para transitar o seu proceso de morte, non ten un tempo definido, senón que responde a unhas necesidades persoais que poden prolongarse durante anos, nos que é habitual que nos vexamos abocados a afrontar problemas sociais, estigma, soidade, illamento, discriminación, depresión, ansiedade, esgotamento, etc.

A compaixón pode ofrecernos unha experiencia valiosa e significativa que mellore a convivencia e reforce vencellos entre as persoas.

Os medios dos profesionais sanitarios son insuficientes, debido a que se ocupan de curar e preservar a vida. Un soporte social e comunitario pode colaborar e estar moito máis preto de proporcionar a comprensión para vivir o final da vida e a morte sen entrar en contradicións de tipo profesional que son orixe de conflitos nun momento de moita vulnerabilidade.

OBXECTIVOS

Cultivar persoal e socialmente unha comprensión que nutra a idea da morte como feito inevitable, en pos de crear unha comunidade consciente e activa para atopar novas formas de acompañar e vivir a morte.

METODOLOXÍA EMPREGADA

Participativas

Por medio de dinámicas grupais, que animen e fomenten que as persoas se apropien do tema e contribúan coas súas experiencias.

Artísticas

A expresión artística como estratexia de autocoñecemento, mellora da comunicación e dinamización.

A arte é un medio de expresión que acompaña, que nos descobre, un proceso no que a creación é un descubrimento, algo imprevisible, como a morte.

Activas

Capaces de involucrar ás persoas que participan para que, de feito, se convertan en protagonistas do proceso de construción do coñecemento de seu, baseándonos menos na transmisión de información e máis no desenvolvemento de habilidades.

Persoal

Escoita activa, presencia consciente, compromiso.

ACCIÓNS ESPECÍFICAS DO PROGRAMA

Accións de sensibilización en centros de día e residencias.

Dirixidas a profesionais que actualmente traballan en residencias y centros de día, así como a familiares implicados. Conferencias e talleres sobre a morte e o final da vida.

Accións comunitarias.

Dirixidas a persoas que están na etapa final da vida en residencias e centros de día. Actividades de arteterapia coa comunidade de persoas que comparten as residencias e centros de día.

Accións de documentación

Coa documentación fotográfica das diferentes actividades que se leven a cabo: divulgativas, formativas, creativa…, crearase un fondo de imaxes que servirá como rexistro e memoria das actividades e accións realizadas. Ademais, unha escolma dese fondo fotográfico será recollida nunha publicación en A5 a color, unha ferramenta valiosa para campañas de concienciación social así como para a promoción, divulgación e publicidade de actividades no futuro.

Proxecto fotográfico retrato creativo fin de vida (A IMAXE DA MIÑA MORTE). Ante o tabú que supón actualmente a morte e a dificultade para facer un achegamento consciente a ela, propomos unha actividade artística, a modo de exercicio lúdico, que sirva para acercarnos ao noso propio fin de vida, visibilizalo e visibilizarnos, abrindo así un espazo onde facer unha reflexión relaxada sobre o que significa a morte para cada persoa e como nos gustaría vernos cando chegue o momento.

Os retratos resultado desta actividade farase unha exposición itinerante polos concellos da contorna.

ÁMBITO TERRITORIAL DE ACTUACIÓN

Concellos de Vigo, Ponteareas e Covelo, provincia de Pontevedra.

VALORACIÓN DOS RECURSOS DE ACTUACIÓN

Recursos humanos:

• • PATRICIA ÁLVAREZ LOUREIRO. (FORMACIÓN)
  • Fisioterapeuta, osteópata sacro-craneal e biodinámica.Coordinadora da Finca Da Seara e membro da Fundación Eomaia.